唔好以為當蛀牙、牙周病嚴重，細菌感染牙髓，造成牙髓炎，就一定會引起痛楚，其實有時徵狀可以好輕微甚至無症狀，但細菌已經無聲無息咁侵蝕牙髓神經，令牙髓壞死。

所以定期做牙科檢查真係好重要㗎！當牙醫發現有牙髓炎嘅情況，喺評估之後可能會建議進行杜牙根療程，將受感染或壞死嘅牙髓組織清除並封起根管，睇吓可唔可以保留返隻牙，但過程中有機會因為刺激到牙根尖周圍組織，而引發脹痛等不適，同時藥物發揮滲透作用，不過一般維持短時間就會消失㗎啦。

對杜牙根療程有疑問，記住諮詢牙科醫生嘅意見啦！